මිලින්ද ප්‍රශ්නය මැයින් රචිත බෞධ ග්‍රන්ථයක් තිබෙන බව අප කව්රුත් දන්නා කරුණකි. එයට අන් බෞද්ධ පොත් පත් අතර සුවිශේෂ තැනක් හිමි වන්නේ බුදු දහම ගැන බටහිර මතය පලකරන පළමු පොත එය වීම නිසාය.සිංහලෙන් මිලින්ද රජු ලෙස නම් කලත් බටහිර ලෝකය දන්නා මියන්ඩර් නම් ග්‍රීක රජු සහ නාගසේන හිමියන් අතර පැවති ධර්ම සංවාදය මිලින්ද ප්‍රශ්නය තුලින් විස්තර කෙරේ. එය විශාල පොතක් උවත්, තරමක අමාරු සිංහල භාෂා ශෛලීයකින් ලියා තිබුනත්, බුදු දහම ගැන ඇති බොහෝ ගැටළු වලට පිළිතුරු ලබා දීමට පොහොසත් එකකි. එය අන්තර් ජාලය තුලින් බා ගෙන කියවිය හැකිය. එහෙත් එය ඒක දිගට කියවිය හැකි නව කතාවක් නොවේ. මා යෝජනා කරන්නේ එය ටිකෙන් ටික කියවිය යුතු පොතක් හැටියට ඔබේ පරිගණකය තුල ඇති පොත් ගොන්න තුල තබා ගැනීමටයි.
මිලින්ද ප්‍රශ්නය ගැන නොදන්නා අයගේ පහසුව තකා කෙටියෙන් විස්තර කලොත් අලෙක්සැන්ඩර් නම ග්‍රීක රජුගේ පාලනය යටතේ පැවති සියල්කොට් නගරයේ පාලකයාවූ ග්‍රීක ජාතික මියැන්ඩර් රජු සහ නාගසේන මහා රැහැන් වහන්සේ අහර පැවති ධර්ම සාකච්චාව මේ පොතේ දැක්වේ.වාදයට රුසියෙකුවූ මේ රජු සමග වාද කිරීමට නොහැකිව බොහෝ බෞද්ධ භික්ෂුන් වහන්සේලා පරාජයට පත්ව සිටි කාලයක නාගසේන මහා රහතුන් වහන්සේ එම අභියෝගය ජය ගත්හ. මේ වාදය පවාහි සමයේදීම පොත ලියවී නැති බවත් මුඛ පරම්පරාවෙන් කාලයක් පැවතියාට පසු එය ග්‍රන්ථා රුඪ වී ඇති බවත් පොතේ ප්‍රස්ථාවනාවේ දැක්වේ. අද අපට දක්නට ලැබෙන පාලි මිලින්ද ප්‍රශ්නය සිහලට පෙරලා සිංහල මිලින්ද ප්‍රශනය නුවර යුගයේදී හිනටිකුඹුරේ සුමංගල මා හිමියන් විසින් සම්පාදනය කලත්,ඊට පෙර ලියවුනු සිංහල මිලින්ද ප්‍රශ්නය නම පොතක් හිබුන බවත් එය එකල අස්තානගතවී ඇති බවත් කියවේ. සිංහල පොත පළමු වරට මුද්‍රණය කලේ 1875 වසරේදී මොහොට්ටිවත්තේ ගුණානන්ද හිමියන්ගේ මුලිකතවයෙන්ය. පාලි මිලින්ද ප්‍රශ්නය රීස් ඩේවිස් මැති තුමා විසින් ඉංග්‍රීසියට පෙරලා ඇත.
