Wednesday, April 22, 2015

සමරසේකරගේ සිතුවිලි : සමරසේකරගේ සිතුවිලි : 19 වන ව්‍යවස්ථා සංශෝධනයටත් කාඩ් කුට්ටම අනමින් සෙල්ලම් කරන 305 game එකටත් බලපාන්නේ එකම නිතියද?

සමරසේකරගේ සිතුවිලි : සමරසේකරගේ සිතුවිලි : 19 වන ව්‍යවස්ථා සංශෝධනයටත් කාඩ් කුට්ටම අනමින් සෙල්ලම් කරන 305 game එකටත් බලපාන්නේ එකම නිතියද?

304 ගේම් එක තවමත් ඉවර නැත.

19 වන ආණ්ඩු ක්‍රම ව්‍යවස්ථා ශන්ශෝධනය කරන්නට හදන විදිය හරියටම 304 ගේම් එක සෙල්ලම් කරන්න හදන ආකාරයට කරන්න හදනවා වාගෙයි කියලා මා මිට කලින් ලිව්වනෙ. එතැනදී මම 304 වෙනුවට 505 කියල වැරදියට ලිව්වත් මා ඉදිරිපත් කල  අදහස සනාථ කිරීමට භාවිතා කල කරුණු වල වෙන වැරැද්දක් තිබුණේ නැහැ.

පාර්ලිමේන්තුව තුල සිදුවන  විවාද විවාද  සජිවව බැලීමට tv එකේ 91 චැනලය තියෙන නිසාත්,ඒවා නිවාඩු පාඩුව බැලීමට තරම් රුපවාහිනි තාක්ෂනය අද අප රටේ දියුණුවී තිබිමත් නිසා මට ඊයේ හවස රුප පෙට්ටිය ළඟ ඉඳගෙන,  ඊයේ උදේ සිදුවුණු විවාද සංස්කරණයකින් තොරව සම්පුර්ණයෙන් බැලීමට හැකි උනා. මා එසේ උනන්දු උනේ එදින 19 වන ආණ්ඩු ක්‍රම ව්‍යස්ථාව ඉදිරිපත් කරන බවට තිබු ප්‍රචාරය නිසයි. නමුත් අල්ලස් කොමිෂන් සභාවේ නව අධක්ෂ ජනරාල් තුමියගේ ක්‍රියා කලාපය ගැන පෙරේදා ඇතිවූ අලකලංචිය ඊයේ පාර්ලිමේන්තුව ආරම්භයේදීම නිමා නොවුන  බැවින් මගේ අභිලාශය ඉටුවූයේ නැහැ. ඒත් එම අලකලන්චියත් සමනය කිරීමට ගත් ක්‍රියාමාර්ගය තවත් 304 ගේම් එකක් සෙල්ලම් කිරීම වාගේ දෙයක් ලෙස  මට හැඟුණ නිසා ඒ ගැනත් ටිකක් ලියන්න ඕනෑ.

 සාමාන්‍යයෙන් පාර්ලිමේන්තුව හඳුන්වන්නේ නීති සම්පාදකයන් යන අර්ථයෙන් තමයි. මේ නීති සම්පාදකයන් නීතිඥයන්ම නොවුනාට ඒ අයට උසාවියකදී නඩුකාර හාමුදුරුවන්ට දක්වන ගරුත්වය වගේ ගරු සැලකිල්ලකුත් මෙන්ම පහසුකම්ද ලැබෙනවා.මම මින් අදහස් කරන්නේ සාමාන්‍ය විධියට අපි දන්නා වාහන බලපත්‍ර,වෛද්‍ය පහසුකම්, විශ්‍රාම වැටුප්   වැනි පහසුකම් ගැන නොවේ. පාර්ලිමේන්තුවේ ඕනෑම විෂයයක් ගැන හැදෑරීමට අවශ්‍ය අංග සම්පුර්ණ පුස්තකාලයක් තිබෙනවා.එමෙන්ම තමන්ට අවශ්‍ය වෙනත් ඕනෑම තොරතුරක් එසැනින් ලබා ගත හැකි සන්නිවේදනය ජාලයක් තිබෙනවා. ඒ ඒ ඇමතිවරයාට වෙන්වූ කාර්යාලයක් තිබෙනවා. නමුත්  සාමාන්‍ය පුද්ගලයෙකුට මේ පහසුකම් නොමිලයේ  ලැබීම සිහිනයක් විතරයි. එපමණක් නොව මැතිනියගේ කාලේ හදපු  ක්‍රමයක් නිසා පාර්ලිමේන්තු මන්ත්‍රී වරයෙක් වීමේ සුදුසුකම මතම නීති විද්‍යාලයට ඇතුලත්වී එහි අධ්‍යාපනය ලැබීමෙන් පසු නීතිඥ වරයෙක් ලෙස වෘතිය සුදුසුකම් ලැබීමටද පුළුවන්.

        අනෙක් කරුණ කිසිදු මන්ත්‍රී වරයෙකුට පාර්ලිමේන්තුව තුල හිටිහැටියේ දඩස් ගා නැගිටලා ප්‍රශ්න අහන බැහැ.ප්‍රකාශයක් කරන්න බැහැ. ඒවා කලින් කතා නායක වරයාට ඉදිරිපත් කරන්න ඕනෑ. කතානායක කාර්යාලය ඒවා අදාළ ඇමතිවරයාට යොමු කරන නිසා ඇමතිවරයාට සිද්ධිය අධ්‍යයන කර අංග සම්පුර්ණ නිවැරදි උත්තරයක් දෙන්නට හෝ උත්තර දීමට කාලක් ඉල්ලන්න පුළුවන්. 

අල්ලස් කොමසාරිස් ජනරාල් තුමිය හිටපු ජනාධිපතිවරයාට සිතාසි නිකුත් කිරීමේ ප්‍රශ්නය මේ විධියට දැනමුත්තෝ අධ්‍යනය කළා නම් දින දෙකක් කාලය නාස්ති කර ලබා ගත් උත්තරය   විනාඩි 5 කින් විසඳා මේ ගැටළුව විසඳා ගන්න ඉඩ තිබුනා. අගමැති,සභානායක,සහ අධිකරණ ඇමති කියන්නෙ ඒගොල්ලෝ කැමති උනත් නැති උනත් කළමනා කරුවන්. ඒ කියන්නෙ තීරණ  ගන්නන්. නමුත් නීතිඥයෝ  නෙමෙයි. නීතිඥයෝ කියන්නෙ තීරණ ගන්නන්ට තම තීරණය ගැනීමට ආධාරක සපයන්නෝ පමණයි. මේ නිසයි ගැටලුවකදී පැමිණිල්ලේ නීතිඥ වරයා කියන කරුණට හාත්පසින්ම වෙනස් කරුණක් විත්තියේ නීතිඥයා කියන්නෙ . මෙතැනදී ඒ දෙන්නාම තමන්ට වාසි කරුණු විතරක් කියන්නෙ හරියට 304 ගේම් එකක් සෙල්ලම් කරනවා වාගෙයි.

හොඳ තීරණ ගන්නෝ පළමුව, තමන් කැමති දේ හෝ තමන් දන්නා දේ තීරණ ලෙස ප්‍රකාශ කිරීමට පෙර තම රාජකාරිය වන තීරණ ගැනීම අඩංගුවන  කළමනාකරණ මුලධර්ම කුමක්දැයි හරියට දැනගත යුතුය. මා දන්නා පරිදි කලමනාකරණය යනු හරි දේ හරියට කිරීමයි. වැරදි දේ හරියට කිරීම හෝ හරි දේ වැරදියට කිරීම කළමනාකරණය නොවේ. මෙය අධිකරණ ඇමතිවරයා දැන සිටියේ නම් මුලින්ම සිතාසි අත්සන් කිරීමේ බලධාරියා වන අල්ලස් කොමිසමේ සභාපතිවරයාගේ අත්සන රහිතව ප්‍රශ්නගත සිතාසිය නිකුත්වී ඇතිබව මුලින්ම දැනගැනීමට ඉඩ තිබිණ   එමෙන්ම අල්ලස්  පනතත් ආණ්ඩුක්‍රම ව්‍යවස්තාවේ වගන්තිත් අතර ගැටුමක් ඇත්නම් එය මගහරවා විමර්ශනය කරන ආකාරයත් ගැන සිතීමට ඉඩක් තිබින්න. ඒඅනුව සුදුසු උත්තරයක් ලබාදී ප්‍රශ්නය මුලින් උපුටා දැමීමට ඉඩ තිබිණ. ඇමතිවරයා කළමනාකරුවෙක් ලෙස මේ ගැටලුව දෙස බැලුවේ නම් අවසානයේදී ඔහු එළඹී විසඳුමට මුලින්ම පැමිණීමට ඔහුට බාධාවක් නොතිබිණ.

නමුත් ප්‍රශ්නය කළමනාකරුවන්ගේ ඇසින් නොව නීතිඥයන්ගේ ඇසින් බලා විසඳීමට යාම නිසා ඇතිවූ අලකලංචිය ඊයේ සජීවීව විවාදය බැලු සාමාන්‍ය ජනයාට හොඳින්ම වැටහින. අවසාන ප්‍රතිඵලය වුයේ කොමසාරිස් ජනරාල් තුමිය නෙරපන යෝජනාවක් සම්මත විමය. එකී ලිපිය අද මව්බිම පත්‍රයෙන් කියවූ මට තේරුනේ එම කොමසාරිස්ගේ වැටුප තීරණය කිරීමේ බලය පාර්ලිමේන්තුව සතුව තිබෙන බැවින් සද්භාවයෙන් කටයුතු නොකළ ඇය නෙරපීමේ බලය පාර්ලිමේන්තුව සතු බවය. ඒ යෝජනාව අවසාන වන්නේ කෙසේද යන නම් මා නොදනිමි .

කෙසේ නමුත් මෙම කරුණින් වැදගත් සාධක දෙකක් මැනවින් පැහැදිලි විය.

1.  ස්වාධින කොමිෂන් සභා වල නිලධාරින් පිස්සු කෙලින විට ඔවුන් හික්මවා ගැනීමේ යාන්ත්‍රණයක් අවශ්‍යම බවය.අඩු තරමේ මේ ස්වාධින කොමිෂන් සභා පාර්ලිමේන්තුවේ ස්ථිර තේරීම් කාරක සභාවක පාලනයට හෝ යටත විය යුතුය. 

2. රටේ පාලනය ගැන තීරණ ගත යුත්තේ කළමනා කරුවන් මිස නීතිඥයන් නොවේ. කළමනාකරුවන්ගේ අදහස් නීතිමය රාමුව යටතේ ලිවිම පමණක් නීතිඥයන්ගේ රාජකාරිය විය  යුතුය.
  

සමරසේකර        

Sunday, April 19, 2015

සමරසේකරගේ සිතුවිලි : 19 වන ව්‍යවස්ථා සංශෝධනයටත් කාඩ් කුට්ටම අනමින් සෙල්ලම් කරන 305 game එකටත් බලපාන්නේ එකම නිතියද?

සමරසේකරගේ සිතුවිලි : 19 වන ව්‍යවස්ථා සංශෝධනයටත් කාඩ් කුට්ටම අනමින් සෙල්ලම් කරන 305 game එකටත් බලපාන්නේ එකම නිතියද?

19 වන ව්‍යවස්ථා සංශෝධනයටත් කාඩ් කුට්ටම අනමින් සෙල්ලම් කරන 305 game එකටත් බලපාන්නේ එකම නිතියද?

කාඩ් පැක් එකෙන් කරන බොහෝ ක්‍රීඩාවන් තිබුනත් ඒක සාමාන්‍ය ජනයා අතර ප්‍රසිද්ධවී ඇත්තේ බුරුවා කුට්ටම සහ බුරුවා ගහනවා වැනි පදයන් ගෙනි. ඇත්තෙන්ම  කොළ 52කින් සපිරි කාඩ් පැක්  එක පුදුම නිර්මානයක් මෙන්ම එය භාවිතා කරමින් කරන විවිධ ක්‍රීඩාවන්ගෙන්ද විවිධ ආශ්වාදයන් සාමාන්‍ය ජනතාවට ගෙන දෙයි. මළ ගෙදරකදී සවසට එකතුවන තරුණ පිරිස මිනිය තනි නොකර අවදියෙන් සිටීමට පාවිච්චි කරන එක් උත්තේජනයක් වන්නේ කාඩ් පත ආධාරයෙන් ඕමි අතක් බැලීමයි. සමහර තැන් වලදී මළගම හේතුවක් කර ගෙන බුරුවා ගහන අවස්ථාද නැත්තේ නොවේ. 

ඕමි අතක් බැලීමෙන් දිනීම 305 සෙල්ලම් කිරීමෙන් ලැබෙන දිනුමට වඩා  වෙනස් වන්නේ ඕමි අතක් බැලීමේදී තම පිලට එන ගොඩ වැඩි කිරීමෙන් දිනුම ලැබෙන අතර,ආරම්භයේදීම තුරුම්පුව හෙළිදරව් කෙරේ. සාමාන්‍යයෙන් 305 සෙල්ලමේදී තුරුම්පු හෙළිදරව්  කරන්නේ නැත. එසේ කරන්නේ තමන්ට හොඳින්ම ජයග්‍රහණය විශ්වාසවූ විටය. එමෙන්ම  තම පිලට එන ලකුණු වැඩි කර ගැනීමට   මෙන්ම අනෙක් පිලට වාසි වෙන අවස්තාවකදී එම පිලට අඩු ලකුණක් ලැබෙන පරිදි උපායශීලිව කටයුතු කිරීමක් සිදු කෙරෙන නිසා 305 සෙල්ලම් කිරීම ඕමි සෙල්ලම් කිරීමෙන් පැහැදිලිවම වෙනස් වෙයි. මේ සෙල්ලම් දෙකේදීම සෙල්ලම් කරන්නන්ගේ ඉහට උඩින් සිට දෙපැත්තේම කොළ බලා සිටින මධ්‍යස්ථ ප්‍රේක්ෂකයෝ මෙන්ම තම පිලේ ජයග්‍රහණය අපේක්ෂා කරමින් විවිධාකාර මට්ටමින් උපදෙස් දෙන ප්‍රේක්ෂකයෝද සිටිති.  
 අද අප රටේ සාකච්චා කරන 19 ආණ්ඩුක්‍රම ව්‍යවස්ථා ශන්ශෝධනයද මට නම් පෙනෙන්නේ හරියට 305 ක්‍රීඩාව සෙල්ලම් කිරීමක් ලෙසටය. ගේම සිදු කරන්නේ පාර්ලිමේන්තුව තුලය. මේ  රටේ ජිවත්වන සියලුම මහජනයා ප්‍රේක්ෂකයෝය. සාමාන්‍යයෙන් මල ගෙදරකදී එහි රැඳී සිටින සියලුම දෙනා කාඩ් සෙල්ලම ගැන උනන්දුවක් නොදක්වනවා මෙන්ම රටේ  සියලුම ජනතාව  අඩුවැඩි වශයෙන් මේ ව්‍යවස්ථා ශන්ශෝධනය ගැන උනන්දුවක් දක්වන්නේ නැත. හැබැයි ඕමි ගහනවා කියල පෙන්නලා බුරු පොලක් එතන පැවැත්වුවොත් ඒ බුරු පොලට පනින පොලිසිය එතන සිටින සියලුම දෙනා කුදලා ගෙන යන්නේ බුරු ගැහැව්වා හෝ නැතා තමන් එතන සිටීම හේතුකොට ගෙනය. ඒවාගේම තමන් උනන්දුවක් දැක්වුවත් නැතත් දැනට කිරීමට උත්සාහ කරන  ආණ්ඩු ක්‍රම ව්‍යවස්ථා ශන්ශෝධනය කෙරුනොත් ඉන් සිදුවන බලපෑමට නම් මේ  රටේ ඉන්නා සියළුම දෙනා යටත්විය යුතුය.

මේ සෙල්ලමේ ආරම්භයේ සිටම එහි තුරුම්පු හංගා ඇත්තේ ව්‍යවස්ථා සම්පාදනය භාරව සිටින්නේ කුමන ඇමති වරයාටද යන්න ජනතාවගෙන් හැන්ඟීමෙනි.මට නම් සිතුනේ මේ ව්‍යවස්ථා ශන්ශෝධනය  සම්පාදනය කල  ලොක්කාට  ජනාධිපතිගේ ව්‍යවස්ථා සම්පාදක ලෙසින් උපදේශක පදවියක් ලැබූ නිසා මෙම 19 වන    ශන්ශෝධනය පිටු පසින් ඉන්නේ මෑත කාලයේදී 62 ලක්ෂයක ජන වරම ලැබූ ජනාධිපති බවය. නමුත්   එය එසේ නොව ව්‍යවස්ථා සම්පාදන විෂයය භාරව සිටින්නේ අගමැතිවරයා බව මේ ශන්ශෝධනය කෙටුම්පත් කල නිතිඥ ලොක්කාගෙන් ඊයේ අහම්බෙන්  එළිදරව් විය. (වර්තමාන  අගමැතිවරයාට පාර්ලිමේන්තුවේ බහුතර කැමැත්ත නොමැතිව එම අගමැති  තනතුර ලැබුන සැටි කව්රුත් දන්නා දෙයකි. එතුමාගේ මදක් ඈත අතීතය දෙස බැලුවොත් එකල සිටි ජනාධිපති තුමියටත් නොදන්වා 2002 වසරේ සාම ගිවිසුම ගහපු හැටි සහ ඒකෙන් රටට සිදුවූ අබග්ගය මෙන්ම ඊයේ පෙරේදා මහ බැංකුවට අධිපති කෙනෙක් පත් කරලා රටට රුපියල් බිලියන 40 ක පාඩුවක් සිදු කර මොකුත් නොදන්නා බබා වගේ ඉන්න හැටි රටම දනී.) 

පුරෝහිතයෝ සෙට් එක තම පිලේ වාසියට පාස් කල දෙවෙනි ඉහල කොලේ නම් මේ ශන්ශෝධනය හදිසි පනතක් ලෙස ශ්‍රේෂ්ඨාධිකරණයට ඉදිරිපත් කිරීමට උත්සාහ කිරීමයි. මේ වෙලාවේ හෙළ උරුමය තුරුම්පු කොලයක් භාවිතා කර එම අතේ වාසිය තමන්ගේ අතට ගත් නිසා පුරෝහිතයන් විසින්  මුලින් තම වාසියට පාස් කල ලොකු කොලයෙන්  පලක් වුයේ නැත. මේ අනුව 19 ව්‍යවස්ථා ශන්ශෝධනය සාමාන්‍ය පනතක් ලෙසින් ගැසට් කර, එය පවතින ආණ්ඩුක්‍රම ව්‍යවස්ථාවට එකඟද නැද්ද යන විමසීමට  අධිකරණයට ගිය අතර එය පක්ෂ විපක්ෂ පෙත්සම් 19ක් අනුව විභාගයට ගෙන අධිකරණයේ මතය ප්‍රකාශ විය. අධිකරණයේ මතය මහජනයාගේ දැනගැනීමට එලියට ආවේ පාර්ලිමේන්තුවේදීය. මෙහිදී අගමැතිවරයා ප්‍රකාශ කලේ පාර්ලිමේන්තුවේ 2/3 කේ චන්දයෙන් සම්මත වීමෙන් පසු  ජනමත විචාරණයකට යා යුතුය යන අධිකරණයේ මතය දැක්වෙන වගන්ති ඉවත් කර, 2/3 කේ චන්දයෙන් සම්මත විය යුතු ඉතිරි වගන්ති පමණක් ව්‍යවස්ථා ශන්ශෝධනයට ඉදිරිපත් කරන බවය.

මෙතැනදී පුරෝහිතයෝ තුරුම්පුව මේක යයි නොපෙන්වා නමුත් තුරුම්පු කොලයක් ඇද්දේය.එසේ කලේ තමන්ට අවාසියට තියෙන තුරුම්පු එලියට ගැනීමට යයි මට සිතේ. එය 305 ගේම් එකකදී සාමාන්‍යයෙන් කරන දෙයකි. එනම් මුලින් කී ගැසට් පත්‍රයේ නොමැති,පිටු 12කින් යුත්ජනාධිපති වරයාගේ බලතල අගමැතිවරයාට පවරන කරුණු අඩංගු වාර්තාවක් අධිකරණයට යවා එහි පිටපත් පාර්ලිමේන්තුවේ ඒ ගැන උනන්දුවක් දක්වන මන්ත්‍රී වරුන්ට පමණක් උත්සාහයෙන් ලබා ගත හැකි විධියට එළි දැක්වීමයි. ඒ ගැන පාර්ලිමේන්තුවේදී මතුවූ ප්‍රශ්න කිරීම් වලදී අගමැතිවරයා උත්තර දුන්නේ පනතක් ඉදිරිපත් කිරීමේදී එවැනි අතිරේක මතුවීම ස්වභාවික බවත්,අධිකරණය විසින් එම කරුණුද සලකා ඇති බවත්ය. තවදුරටත් එදින අගමැතිවරයා කියා සිටියේ අධිකරණයේ සිටි නීතිඥ මහත්වරු කිසිවෙකු ඒ ගැන විරුද්ධ වුයේ නැති බවය. නීතිය සාමාන්‍ය දැනුමක් ඇති මා අගමැති වරයා පාර්ලිමේන්තුවට දැක්වුයේ සත්‍යයක් යයි සිතිමි. 
එහත් පසුව අදාළ කරුණ අධ්‍යයන කිරීමෙන් පසු මට තේරුම් ගියේ අධිකරණය පසුව ඔවුන්ට ඉදිරිපත් කල ලියවිල්ල ගැන නිහඬවී ඇති බවය. මන්ද ඒ ගැන මතය පල කිරීමට ඔවුන්ට පැවරුන බලයක් නැති නිසාය.මේ පිටු 12කින් සමන්විත ලියවිල්ල ගැසට් කල එකක් නොවන නිසා සාමාන්‍ය මහජනයා එහි ඇත්තේ මොනවාද කියා හරියටම දන්නේ නැත. කනින් කොනින් ඇසෙන්නේ අධිකරණය 2/3කේ චන්දයට අමතරව ජනමත විචාරණයට යා යුතු යයි කියා ඇති සියලුම කරුණු එනම් අගමැති වරයාට  සුවිශේෂ  බලයක් ලැබෙන කරුණු එහි ඇති බවය. එය 2/3 කේ චන්දයට සහ ජනමත විචාරණයට නොගොස් පාර්ලිමේන්තුවේ කාරක සභා අවස්ථාවේදී ශන්ශෝධන ලෙසින් ඉදිරිපත් කර එය සාමාන්‍ය   වැඩි චන්දයෙන් පමණක් සම්මත කිරීම සැහේ යයි දැන මුත්තෝ තර්ක කරති. තවත් සමහරු පවසා ඇත්තේ කාරක සභා අවස්ථාවේදී ශන්ශෝධන කල හැක්කේ පනතේ මුලික හරයට බධාවක් නොවන කරුණු නිසා එය කල නොහැකි බවත්,කලයුත්තේ නව එකතුව ගැසට් කර එය ගැන අධිකරණයේ අභිමතය විමසිය යුතු බවය.

  මට තේරෙන අන්දමට පසුගියදා නියෝජ්‍ය කතානායක තුමාගේ ප්‍රධානත්වයෙන් පැවති පක්ෂ නායක රැස්වීම තීරණයකට නොපැමිණ ප්‍රශ්නය අද දිනට කල් ගියේ ඒ නිසාය. අද දින  දැනගැනීමට ඇත්තේ මේ ගැටලුව හෙට දින එනම් 20 දා  සොයා බලන බවය. 

ඉතින් 305 ගේම් එක ඉවර නොවී තවම සෙල්ලම් කරන මටමේ තිබෙන නිසා මේකෙන් දිනන්නේ කවුද කියා දැන්මම අනාවැකි පල කරන්න බැරිය. 

සමරසේකර              



   

Thursday, April 16, 2015

සමරසේකරගේ සිතුවිලි : 19 වන ආණ්ඩුක්‍රම ව්‍යස්ථා සංශෝධනයත් හරියට එකක් කඩතොළු මකා ගන්නට ගොසින් සිදුවූ කාරියා..... වාගෙ එකක් වේවිද?

සමරසේකරගේ සිතුවිලි : 19 වන ආණ්ඩුක්‍රම ව්‍යස්ථා සංශෝධනයත් හරියට එකක් කඩතොළු මකා ගන්නට ගොසින් සිදුවූ කාරියා..... වාගෙ එකක් වේවිද?

19 වන ආණ්ඩුක්‍රම ව්‍යස්ථා සංශෝධනයත් හරියට එකක් කඩතොළු මකා ගන්නට ගොසින් සිදුවූ කාරියා..... වාගෙ එකක් වේවිද?

19 වන ආණ්ඩුක්‍රම ව්‍යස්ථා සංශෝධනයත්  හරියට එකක් කඩතොළු මකා ගන්නට ගොසින් සිදුවූ කාරියා..... වාගෙ එකක් වේවිද? 

සිංහල අලුත් අවුරුදු සමයේ ගතවුණු නොනගතය කාලයේ පොතක් පතක් බලන්න හෝ වෙනයම් කටයුත්තක් කරන්න ඉඩක් නැති වෙලාවේ පසුගිය සමයේ මහත් ආන්දෝලනයට පත්වූ ආණ්ඩු ක්‍රම ව්‍යස්ථා සංශෝධන ප්‍රයත්නය ගැන මගේ සිතේ ඇතිවූ අදහස් ටික අද ලියන්න හිතුවා. මේ අදහස් වලට මුල බීජය සැපයුවේ http://drackey.blogspot.com/ ලියන draki සොයුරා බව ඉස්සරවෙලාම මතක් කරන්න ඕනෑ.
 පළමුවෙන්ම ලියන්න ඕනෑ කාරණය නම් මම නීතිඥක් හෝ වෙන්ඩ නීතිඥයෙක් හෝ හංසයාට චන්දය දුන් අයෙක්  නොවන නිසා ඉහතකී අන්ත දෙකෙන්ම  බැහැරවී  මේ රටේ ජිවත්වන සාමාන්‍ය පුද්ගලයෙක් මේ ව්‍යස්ථා සංශෝධනය ගැන සිතන ආකාරය ලිවිම මගේ අරමුන බවය. මම එහෙම ලියන්න හිතුවේ මේ ව්‍යවස්ථා සංශෝධනයෙන් පසුව ඇතිවන ප්‍රයෝගික ක්‍රියාකාරිත්වය නිසා  මතුවිය හැකි  බලපෑම් වලට   අපි සියලු දෙනාම ගොදුරු වන හෙයින් සාමාන්‍ය පුද්ගලයෙක් මේ ගැන හිතන්නේ  කෙසේද කියා දැක්වීමටය.

 පුද්ගලයෝ හැටියට අපි සියලු දෙනාම අඩුවැඩි වශයෙන් ගත්තොත් අන් අය යටතේ ඉන්නට  අකමැත්තක් දක්වන නිසා පදයක් හැටියට ගත්තොත් ජනාධිපතිගේ බලතල අඩු කිරීම යන්න හොඳට විකුනන්න පුලුවන් මාතෘකාවක් තමයි. ඒ උනත් මේ බලතල අඩුකිරීම ගැන ඇති පසුගිය අද්දැකීම් වල එනම් 17 වන ආණ්ඩුක්‍රම විව්‍යස්ථා සංශෝධනයෙන් පසුව මහජනතාවට ඇතිවූ බලපෑම ගැන නැවත වතාවක් හිතලා බලන්න කාලය ඇවිත්.

 ඒ කාලේ තමන් ස්වාධින නිසා කාටවත් අඩු තරමේ පාර්ලිමේන්තුවටවත් යටත් නැහැ කියල රාජ්‍ය සේවා කොමිසම නටපු පිස්සු කෙලිය කාට කාටත් මතක ඇතිනෙ. පොලිස් කොමිසමත් එහෙම පිස්සු කෙලියා. ඒවාගෙන් තැලුනේ සාමාන්‍ය මහජනතාව. මේ ආයතන තිබුනත් ඒවායේ පාලනය භාරව ඉන්නෙ නිලධාරීන්. නිලධාරින් පිස්සු කෙලියාම ඒකෙන් හිරිහැරයට පත් වෙන සාමාන්‍ය මිනිහාට තමන්ට සිදුවූ අසාධාරණය ගැන කියන්න තැනක් තියෙන්න ඕනෑ. කාට හරි මෙතනදී කියන්න පුලුවන් ඇයි ඒකට තමා  මුලික අයිතිවාසිකම් කඩවුනා කියලා යන්න උසාවිය කියලා තැනක් තියෙන්නෙ කියලා. ප්‍රායෝගිකව මුලික අයිතිවාසිකම් කඩවුනා කියල උසාවී යන්න පුලුවන් වන්නේ නිතිඥ මහත්වරුන්ට ගෙඩි රුපියල් ලක්ෂ ගණනින් ගෙවන්න පුළුවන් සල්ලිකාරයන්ට විතරයි කියල දන්නේ එහෙම උසාවියේ සරණ පැතු අයම විතරයි. එහෙම උසාවියට ගියත්  පෙත්සමේ තියෙන කරුණු කාරනා හොයා බලන්නෙ නැතුවම පෙත්සම ලියා ඉදිරිපත් කිරීමේ   අඩුපාඩුවක් පෙන්වා  පෙත්සම අහක දමන අවස්ථා කොපමණ තියෙනවාද? එතකොට අසාධාරණයට ලක්වූ පුද්ගලයාටසිදුවන්නේ මොකක්ද? සිදුවූ අසාධාරණය සමනය නොවී තිබියදීම නිතිඥ මතතුන්ට ලක්ෂ ගණනින් මුදල් ගෙවීමට නොවේද? ඒ නිසා උසාවියට යාම නම් හොඳ ප්‍රතිකර්මයක්  නෙමෙයි. 

draki නම් කියන්නේ ව්‍යස්ථා සභාව පත් නොකල ණිසා ඒ අර්බුදය ආපු බවයි.  ඒකට පිළියම හැටියට එකල භාවිතා වුන අන්දමට රාජ්‍ය සේවා කොමිසමේ බලතල කැබිනට් මණ්ඩලයට  ගැනීම වැරදියි යන්න තමයි එතුමාගේ මතය.  ඒක   හරියට ලෙඩා මලත් බඩ සුද්ද උනා යයි කියන උපහැරණය සිහියට එන්නක්. මට නම්  හිතුනේ පාර්ලිමේන්තුවේ පෙත්සම් කාරක සභාව හෝ ඕම්බුස්මන් වරයා වැනි ක්‍රමයක් ස්ථාපනය කිරීම වඩාත් සුදුසු බවයි. ඒ අසාධාරණයට පත්වූ වින්දිතයාටම තමන් වෙනුවෙන් පෙනී සිට කරුණු දැක්වීමට  ඒවායේ ඉඩ තිබෙන නිසා සහ අඩු පිරිවැයකින්  එම ආයතන වලට  යාමට ඉඩක් තිබෙන  නිසයි.

අනෙක් කාරණය නම් දැනට තියෙන ව්‍යවස්ථාවෙන් පැහැදිලිව ලියලා තියෙනවා බුදුදහම පෝෂණය කිරීමට රජය බැඳී සිටිනවා යන්න. නව සංශෝධනයෙන් ඒක වක්‍ර ආකාරයෙන් යටපත් කරලා තිබුන බව පැහැදිලි වුනේ draki ගේ පැහැදිලි කිරීම් වලින් පසුවයි.මගේ පැනයට උත්තර හොයන්න එතුමා ගොඩක් වෙහෙසිලා තියෙනවා.ඒකට ගෞරව කරන ගමන් මගේ අදහස ලියන්නයි යන්නෙ. jr ගෙ ව්‍යවස්තාවේ  ඔය පදය නිකම්ම ලියවුනේ නැහැ.ඒකට ඓතිහාසික උරුමයක් තියෙනවා.1815දි අපේ රට භාරගත් ඉංග්‍රීසින් ලියු උඩරට ගිවිසුමේ තිබුන එක වගන්තියක් තමයි බුදු දහම පෝෂණය කර ආරක්ෂා කිරීම. ඉංග්‍රීසින් ඒක ප්‍රායෝගිකව ක්‍රියාත්මක කලේ නැති එක වෙනමම ප්‍රශ්නයක්. ඒක ගිවිසුමේ තිබුනාට ක්‍රියාත්මක නොවන්නක් බව උඩරටියන්ට ඉක්මනින්ම තේරුම් ගිය නිසා තමයි  1818 දී  උඩරට විමුක්ති අරගලය ආරම්භ ආරම්භ වුනේ. ඒ උනත් වැදගත් කාරණය ඒ වගන්තිය වෙනස් නොකරම තිබීමයි. jr ලොක්කා බුදුදහම පෝෂණය කල ආකාරය ගැටඹේ පන්සලට කටුකම්බි ගැසීමෙන් සහ මහා මළුව පවරා මැනවින් පෙනෙනවානේ. 

පසුගිය රජයේ බුද්ධ සාසන අමාත්‍යාංශය භාරව සිටියේ දී .මු. ජයරත්න අගමැති වරයා  කොතරම් හොඳට බුද්ධාගම පෝෂණය කලාද යත් අදටත් බුද්ධ සාසන පෝෂණයට අදාළ වැදගත් පනත් කිහිපය පාර්ලිමේන්තුවෙන් සම්මත නොවී තිබෙනවා. අන්‍යාගම්කරණය වැළැක්වීමේ පනත ආගිය අතක් නැහැ.බෞධයන්ගේ යහපත වෙනුවෙන් පිහිටවූ හෙල උරුමයට මන්මුලාවැල්  පෑගිලා නන්නත්තාර වෙලා. ව්‍යවස්තාවේ බුදුදහම පෝෂණය කිරීමේ පදය තිබියදීම
ප්‍රායෝගික තත්වය ඔහොම නම් නව සංශෝධන වලින් පස්සේ මොනවා නොකෙරේවිද? බුද්ධාගම පෝෂණය කිරීමේ වගන්තිය හැලුනත් නව අග විනිසුරුවරයෙකු පත් කිරීමේදී නිතිඥ සංගමයේ උපදෙස් ලබා ගත යුතුය කියල වගන්තියක් ඇතුලත් කිරීමට නම් පුරෝහිතයෝ අමතක කරලා නැහැ. මා දන්නා විදිහට නම් නීතිඥ සංගමය රාජ්‍ය නොවන සංවිධානයක්. රාජ්‍ය නොවන සංවිධානයක රාජකාරියක් ආණ්ඩුක්‍රම ව්‍යවස්ථාවකට ඇතුලත් කරලා තියෙන්නේ ලෝකෙ වෙන මොන රටේද කියා මා නම් දන්නේ නැහැ.
  
මේ වෙලාවේ මට  නම් මතක් වුනේ පැරණි ජනකවියක් වන 

එකක් කඩතොළු මකා ගන්නට ගොසින් සිදුවූ කාරියා 
සියක් කඩතොළු හදා ගත්තයි කම්මලේ   ආචාරියා 
 ජන කවියේ පද දෙකකුයි. ඉතුරු පද දෙක නම් මතක නැහැ.  

සමරසේකර         
  





Monday, April 13, 2015

ලබන්නාවූ 2015 වසර සුහ නව වසරක් වේවා









ලබන්නාවූ 2015 වසර සුහ නව වසරක් වේවා .....



බක් මාසයේ 14 දිනෙන් ආරම්භ වන නව වසර සියලුම දෙනාට සාමය, සතුට සහ සෞභාග්‍ය පිරි සුභ නව වසරක් වේවා යයි  ඉතා සිතින් පතමි.

සමරසේකර